同一個世伯，同一個夢想
今年是我人生中最投入奧運的一年，睇得最多係網球，睇得最肉緊係體操，睇得最想喊係見到程菲跌左落黎的一剎，仲鍾意左幾個運動員，因為香港兩個台都只係播中國賽事的關係，我鍾意既運動員大部份都是來自中國，李娜、沙芬娜、晏紫、程菲……
．
不過，睇得最開心，完全是因為以下兩位。
．
順帶一提，陳恩能亦即丹尼爾，乃我的中學好同學米高之兄，以前經常上他家睇NBA(因為他家有ESPN)，晨咁早搞到佢屋企鬼殺咁嘈，當時佢老豆仲成日話香港無一個評述員識講波（當時講NBA的主要為張丕德和貴神），估唔到十年後佢自己個仔，成為一個非常專業的運動評述員。
．
一個專業的運動評述員，唔係成日要話俾人知自己幾尊業，唔係話俾人知個教練用錯左戰術，唔係掛住個頭銜話自己識邊個識邊個，而係識得講俾我知點樣睇果場賽事，識得講俾我知咩野好睇咩野唔好睇，識得在唔出聲的時間唔出聲，而最最最重要都係，識得咩叫幽．默．感。
．
請受一個自稱專業司儀的小弟向以下兩位人兄由衷說一句：RESPECT～
.
－－－
陳恩能、石金華金句
石:"韓國選手正準備抓舉時"...嘩!你睇吓佢隻小腿同大腿一樣咁粗嫁!!
石:呢位選手出場試舉，又係呢個快舉手呀，果然係快舉手，名都未報已經舉唔倒番緊入休息室"
丹:下?番左入去喇?仲報唔報佢名呀?...報啦
石:再次出場試舉，快舉手
石:快啲講啦!唔係又趕唔切。
丹:係！莎諾娃!莎諾娃!..
石:泰國既舉重選手喎，打泰拳舉手係代表投降喎
丹:所以咪好彩佢係舉重，唔係打泰拳囉
石:你估菲比斯會唔會變崩牙仔?佢囉一次金牌就咬一咬，囉八面咪咬八咬?
石:你唔踢波就做波牛，咁唔通你唔游水做水牛咩
石:大威既肌肉真係好似隻馬咁
丹:點解咁睇呢?
石:我睇馬術知架，大威d肌肉結實又立立令，真係好似隻馬
石:大威今日真係無左團火....
丹:你估睇緊星矢咩，人人都有個小宇宙....
石:呢間屋難拆喇，仲難拆過鳥巢
*(可能係香港史上第一個回應呢句金句的「金回應」)
黃:所以話龍門最好既朋友就係門柱
丹:估唔到呢位巴西既守門員咁快係我地既國土認識左一位新朋友
丹:一個ace之後又一個double fault
丹:真係一淡沙糖一淡....
石:屎....
丹:我都唔想講喇，你幫我補埋佢
石:唔怕啦，而家深夜，又過埋食飯時間
石:拿度食緊既係大蕉來架喎
丹:係大蕉呀，唔係香蕉，唔係黃帝蕉呀
石:大蕉仲有個好處
石:利大便....
石:五個拳證座四邊，翁金驊哥哥你呃我呀?
翁:有一邊座兩個既.....
石:等我仲以為一個吊係上面睇添
翁:你係咪想得太多呀
石:兩個都係歐洲既國家一個向東望，一個向西望，咁就變左東張西望
翁:哈哈....係咪真係變左東張西望架?
石:同大家講聲唔好意思先，因為呢場網球賽太精彩，所以晚間新聞將會順延到我地呢場球賽打完既
丹:其實都無關係，因為聽到我地講野，想睇新聞會去翡翠台，但係如果睇英文新聞既，就唔會聽到我地講野啦，所以係無關係既....
丹:不如每一次用鷹眼都要比錢，d錢就囉去做慈善啦....
石:不如捐比我啦...
丹:都係捐去網聯啦，比佢做青訓
石:可以既捐去眼科啦
丹:嘿嘿...我鍾意你呢個提儀，忍唔住笑左
丹:悔路尼曾經比藥檢捉左架，要停賽18個月，18個月之後....
石+丹:一條好漢....
丹:嘩！打到沙芬娜仆左係度
石:好彩呢度係網球場唔係街
石:我地明珠聽日有好多精彩既比賽，聽日九點夾住糯米雞來睇我地節目
丹:食通粉得唔得呢??
石:得，各大食市接受預訂
.
------
如想繼續欣賞，請往facebook: http://www.facebook.com/note.php?note_id=31964125521
