R字頭: 5月 2009

星期一, 5月 25, 2009

是日本人橡膠高電車之旅(下)

在台場巧遇《21世紀少年》

七年前第一次自己去日本，那時大概是八月的日子，去到唔知點解得果十一二度，落機第一件事做就係走左去無印買衫。七年後的四月，都係十一二度，今次更過份，短TEE短褲涼鞋，星期五晚其實已經買左條紅色運動褲，穿上後走到新宿街頭卻史無前例的感到不好意思起來，感覺好像著住條單車褲入葡京一樣。結果星期六一大清早還是走入UNIQUO重頭到尾執一劑，順便買多兩件TEE當手信送俾自己。
．

星期日的好天氣觀光船之旅告一段落後，在台場只吃了個鐵板燒作午餐便撇，回到香港後才記得應承左馮修拍《一個幾毫續集之守護她的51種方法真人版》，唯有等下次。離開台場，二人便匆匆忙忙趕赴這趟旅行咬牙切齒誓死必到之地－－秋葉原。
.

為甚麼那麼想去秋葉原呢？因為自己叫自己做電車高，唔去好似緊負唔起呢個名既重擔。回想七年前，我和雞也有到過秋葉原，不過大家當時零亢奮，因為唔識行，到今時今日，阿雞很識時務的提醒我：「在這七年中，你電車化了！」我心諗你當戲謔我當讚美，還是朝聖最實際。
.

講到咁亢奮，實際呢，寶際都只不過係行行逛逛，Windows Shopping 多買野少，見到某些珍品讚嘆兩句跟住走頭。要數最難忘，應該是興之所至走入了一間MAID CAFE。因為無聊，我們在街上作了很詳細的評審，最後揀了一間偏僻但仍然有五六個麻甩仔排隊的。等了半小時左右終於入得，格局不大，分為兩邊，近門口那邊是一個長而窄形的三面BAR檯，右邊是三四張少少的四方桌，可以從落地玻璃看到秋葉原的人在走來走去（CAFE在三樓）。
.

我們坐低之後，不同的女僕就會在BAR檯中間的走廊走來走去，同你講下規則推介下MENU然後落單，當佢遞杯野埋黎的時候又會同妳UP一大輪野然後用兩隻手做個心形隊落杯野到，嬌滴滴地說聲：「愛心～注入」，我即刻諗起《野豬大改造》的那一句「NOBUTA POWER～JIL NIL～」簡直想即時表演，不過因為要顧全遊客的身份而將瘋性狠狠厭抑住。
.

突然，成間CAFE既燈突然熄晒，連音樂都轉晒，搞咩呢？原來有兩條麻甩仔嗌左最貴既蛋包飯套餐，跟住成間野所有女僕就拿捧住碟蛋包飯，用茄汁寫佢地個名上去，然後來一張大合照。跟住我即刻同阿雞講：「ｘ～咁正總之我都嗌啦～」不過後尾睇番餐牌都係收番：成個蛋包飯連影相一條龍服務盛惠二百多元。最驚既係，佢地兩個在15分鍾後又嗌多碟超級薯氣套餐……去一轉MAID CAFE夠在香港去兩轉CLUBBING。結果，我同阿雞都係俾左30大元影左張POTRAID就閃。
.

在東京的最後一個晚上，我們走到了涉谷，在地鐵站放低o的野之後阿雞堅持要食燒餅，入到去之後硬係覺得七年前黎過，阿雞就話無，不過比七年前好的是，我比較睇得明餐牌，然後就趁佢地臨打样前拿拿淋燒熟果兩件餅幾條菜。一邊吃燒餅應該要一邊喝啤酒一邊吸煙才快樂，因為和阿雞在一起的我從來不喝酒，所以我只做了後者，忽然覺得原來放假去旅行先可以一邊食煙一邊飲酒才有「旅行FEEL」，諗到呢度真係要歸功曾．蔭權喎又。

吃完晚飯後帶著一身油煙味走到一旁的大型影視店加書店，行行逛逛的走了差不多兩小時，全因過程中因為決定買唔買一套由蒼井優做的電視劇好而磨蹭，磨蹭是因為價錢要成20000日圓，幾乎成港幣1600元，差唔多成張機票咁濟。因為我被中國內地市場縱慣了的關係，所以最後只好放手。幸好最後在中古市場被我平平地執到隻《FUNKY MONKEY BABYS》，回來之後看他的MV的確超正，火雞最愛也！
.

這天買了一袋二袋之後，忽然像醒了一醒的覺得：其實根不不需要來東京啊！我所喜歡的日本，在旺角信和也找得到。 (待續)

星期四, 5月 14, 2009

是日本人橡膠高電車之旅(上)

基於人去我去、人有我有的心態，火雞看到身邊朋友個個話去旅行，又見到o的雞票鬼死咁平，咁就在好倉卒的情況下買左機票，一個月都唔夠就出發。

．

今次旅程由始至終都係火雞一手策劃，我只負責提供平機票渠道。在此特別要發聲明發埋禮炮鳴謝大學好友、2004年度最佳新晉演員銀獎、《一個幾毫》飾演祥祥豬的馮敬修。此人與我識於微時，即係唔知邊日突然大家講起原來讀埋同一間幼稚園對番相發現「咦賣臭係果條戌利o羅」咁～多謝你的資料提供，我欠你隻碟，「總有一日會『燒』番俾你既～」

我的行程是24/4-27/4，星期五到星期一，相當緊密。星期五去到酒店五時正。第一眼見到間酒店真係嘩左一聲，因為記憶中真係未住過貢大間酒店。雖然好多人包括我自己都認為你去旅行都唔會留在酒店架啦貢大FOR WHAT，不過既然而家用庶渣既價錢住到燒鵝既內臟，加上全部都由火雞一手策劃，我沒有SAY NO的理由。而且，為左呢間酒店，我地決定每晚都早一點回家，然後一邊打開個電視一邊嘆買回來的消夜，OK蔡瀾的。

既然星期五早左到，我地就照原地計劃（定係無照呢？）去左有瓦遮頭的六本木，順帶一提，我們的行程plan得相當簡單，就是只MARK了要去邊個區，無特定話一定要去邊間店邊個景點之類。話晒七年未來過東京，我們先在新宿行街－－是真的行街，從酒店的三町目走到火車站，看到EPSON標誌才發現自己原來同七年前BOOK的那間酒店其實相距不遠，因為走的原來都還是那條路。跟住去了六本木，去得六本木，當然想去佢地個博物館，不過去到加埋跌跌撞撞，離博物館關門時間已不多於一小時，「算吧啦～」，唯有繼續在MALL在跌跌撞撞，之後再上了六本木五十幾層高的觀景臺一覽東京夜景，對住個鐵塔時好想唱《東京鐵塔》主題曲。

呈環形的觀光臺人數並不多，而且更幾乎沒有外國遊客，所以心情特別釋懷，無無聊聊的行埋下面個村上龍黃一飛一干人等的藝術商品店待了差不多一個小時。看著那些唔係話好靚但又有小小心動令你想買野的藝術商品店，真的很想為日本政府拍手掌，相比香港的藝術發展局和只懂起嘖水池的城市規劃，除了爆粗我無話可說。走得累了，便回家看電視。事實上，一連三個晚上也是這樣過，和在天水圍沒有太大分別，只不過看的是令我更為亢奮的日本節目吧了。

第二天神算火雞早已在香港CHECK了東京天氣，判定「星期六這天一定會落雨，聽日就唔落啦～」，我一向都唔太信天文台，仲好沙塵咁講「有無咁腫呀～」，點知星期六雨就如狗屎一樣把我的口洗刷乾淨。屌！日本連天文台都準o的乎？咁岩我前一晚又在地鐵站廣告板看到原來兩國正舉行「手塚治虫展」，落咁大雨當然要去室內地方玩下啦～

到達目的地，因為大雨真的相當滂沱，展場人數並不多，不過入到去先知「EXHI如此多FUN！」(EXHI=EXHIBITION)。展覽真正鉅細無遺地展出每一年手塚從三歲到六七十歲與漫畫生涯有關的物事，從小學的昆虫標本、畫了圖畫的習作簿、中學時亂畫一片但仍然鬼火咁靚的手稿，到常盤莊的生活照、真正推出漫畫時的鉛筆稿、彩稿、illustration、到後來拍成真人版特撮片時的道具；從最早期的小飛俠卡通，到就黎上映由香港人做的3D版小飛俠TRAILER，應有盡有。我雖然未去過在隔鄰寶塚市的真正手塚沿虫博物館，不過這個展覽已經的的確確令我大開眼界。之後我們繼續行樓下的博物館，再到涉谷旁的自由之丘吃蛋包飯和還有十分鐘便關門大吉的DESERT FOREST買甜品，由於橫風橫雨，不贅，玩得不大過癮就是，還是回酒店看電視。

．

第三天是我們嚴密佈防的一天，結果天文台相當準，那天除了墾丁之外，連日本都好Q天氣晴。火雞相當自滿兼自豪，我找不到理由掃他的興，便照昨天找回來的leaflet在10點又跑到兩國搵碼頭，在河邊巧遇《二十世紀少年》那個神仙的住所，仲被一個貌似神仙的跑步者老點行左相反方向，最終也有驚無險上了船。坐這艘船的最大原因，是因為小弟看完《蜂蜜與四葉草》之後電車毒發作，暗暗立下人生裡面死前一定要坐一次否則溝女溝到精盡人亡的毒誓。

至於這艘船的第一個奧妙之處，第一是船上沒有外國遊客，只有零落的一兩個帶著小朋友的日本家庭，小朋友還會在甲板上作即興免費表演；第二是你可以上夾板吹風看風景，沿河兩岸的矮屋和高樓錯落並置，惟一的共通點是與生活古兜溫泉一樣做到舒適、恬靜、幽閒！你唔會見到JR果種人夾人人肉列車狀況，只會每隔半分鐘見到一兩個人沿河的跑道或者跑步或在早操或在放狗，因為星期日的關係，西裝被消滅了！跟住見到引水道出現分叉，分叉的中央是幾幢中層的住所，住所對著河中心的那個view，是李嘉成在香港有錢都買唔到的。整個感覺，漂亮得就像《GTA IV》在經過另一個島時的那條大橋時一樣。帶點可惜的是，我不能乘此船經過BIG EYE到人跡更為罕至的葛西公園，和火雞扮熱戀情侶一嘗坐摩天輪的滋味。