永高好天真雞好傻相

(c)Access Gel. Tin Shui Wei, Tin Yui Estate, HK

Saturday Night Fever @ Mcdonald

Fxxk Club成員聚首,獨欠月巴,阿鼻(左)手中的是《阿鼻劍》 ,中間的是疑似李燦森

繼巴黎凱旋門再一次開心到飛起

《幽遊白書》黃泉 featuring 黃金戰士 = 黃全戰士

阿雞心口兩朵大黃菊，我想起《一眉道長》的吳君如

給生命一點顏色..阿雞好似要投河自盡一樣...可能因為我閃得滯。

我隻眼去左邊?王喜上身??

繼疑似藝人後連阿輝都癡住支樹枝。

點解要foc枯葉都唔foc我地呢?

呢張靚仔黎講算好靚仔。Ringo個i字仲有粒花～

呢張靚到做得Wedding Magazine啦～

作品題目: 海棠春睡半含羞...不過無海棠..得海味...... 哈哈哈哈。

永高好天真好傻淫相

EVERYONE 多Q謝

排名不分先後
.
多謝火雞妹同細佬，尤其係阿妹不辭勞苦， 由早上影相跟到夜晚，對佢黎講簡直係爆粗耐力大挑戰，多謝妳幫我買早餐、拎重o野、影相、保管財物同埋唔見左的士司機電話令我間接有八折。恭喜妳有人讚妳似Hebe。
．
多謝阿龍，我出黎做野咁多年但唯一能成為朋友的photo，我認識的朋友之中你係其中一個經常當面奚落我而我又樂在其中的人(仲有邊個自己心照)，多謝你今天不辭勞苦的由早拍到晚，阿雞話覺得你好慘，我話唔需要替你擔心，也唔需要理你，因為我對你是百分之二百信任。我唔知他朝你結婚我有番o的咩可以幫你，唯有幫你搞爛gag吧～(口哨聲)
.
多謝fxxk club成員肥雞鼻，認識時間不長見面時間不多但好像己成為兄弟般的朋友，認識你們確實與有榮焉。多謝阿鼻專登將溝女航班delay到我的婚期之後，何其偉大、月巴雖然黎唔到，但我已將你送給我的《蒼井優寫真集》視為最佳的結婚禮物，同埋你果句最尾無出到街的祝福語，我會常在心中的、最Surprise當然係Karol帶菌出席，火雞勁愛妳兩口子買的agnesb朱古力。
．
多謝打死不離好兄弟的Jacky芳阿叻林建雄Lulu阿維，我最好的一班朋友今日反而最無時間理佢地，於心有愧，多謝Jacky幫我約大家出黎飲o野、多謝你對我在你婚禮做司儀的信任、多謝你放阿叻一條生路、多謝阿維我無到你婚禮但妳有到我婚禮、多謝阿雄一家大細出席，唔知點解，一有聚會我通常都會問左你o係唔o係度先，所以你今日「o係度」係幾咁令我雀躍，尤其是當我到步後第一個就是見到你和BB， 即刻想爆一句「呢o的賣緣份o羅~」、多謝阿叻，阿叻，我唔知點形容你今日能夠出席對我說的意義有多深，我希望過左六十歲之後如果大家未死的話應該無咁忙，到時可以再約你通頂打PS10同飲o野。好多o野想同你地講但無機會，雖然我好耐無浦頭但依然仿有千言萬語講，誓必擇日再聚。
．
多謝打死不離好兄弟第二小隊的張能康肥周Lily溫知新黃爾烙Gap Suen豪爺李威(豪爺李威痴X線竟然做人情，感覺即刻疏遠左o羅我覺得)。講真，你地係我最認為「唔到」同「到唔到」的一班，但亦同時係我心裡面最重要的一班，所以見到你地出席，我係ok開心到扯旗的。
.
多謝我一班大學好友阿修李英偉Hippo志偉Eric，多謝阿修幫我做CNN紀錄訪問，《一個幾毫》團隊萬歲！最偉大係兩位朋友結婚但我同時都無到o既Hippo志偉，對住咁無人性o既我都o黎出席我o既婚禮，你o地既寬怒絕對媲美神，我會找機會同你o地懺悔的。多謝李英偉，每次見到你都好想攬你，好彩都攬左。
.
多謝GAME STATION仝人上班時間拉大隊過o黎，阿勇Emi六蚊Tiger阿業Loki三鬼蘭丸拉斐爾。多謝阿勇，我諗我呢一生人都唔會再遇到一個上司可以friend成咁，多謝你帶我出道(係呀我紅左o架喇o係呢行)、阿業，我想講，你係我過百人之中俾到我最大surprise的一個，證明我在你心目中是有地位的，諗起都興奮。其他感想留待下期編話。如果可以的話，我想一直全心全意繼續為GS工作。
.
多謝天盛籃球的一班後生仔家俊Henry型男費高高丸庭阿明Marco肥初，你地係我唯一親自叫的一班人，因為呢，請容許我恃老賣老，我係ok睇住你地長大的。由家俊叫我阿叔到問我叫咩名我再答你地我叫「三叔」開始，這近三年間你們從唔識打波到而家個個都幾乎勁過我(留意只係「幾乎」)。籃球場的友誼得來不易，故且俾我這個叔父輩佔有你們一點點青春，讓大家各自長大後也會想起今天的好快樂。
.
呀仲有，你班友仔明明個個無收入都買咁貴o野，明顯肆意揮霍老豆老母錢，要鬧。不如賣番出去幫鴨仔籌旗啦～(說明：鴨仔因在婚姻註冊處門外丟煙頭而被罰款1500)。
.
多謝Cosplay界代表Celcius，很喜歡妳的熱情，我做左五年cosplay event，見盡一切醜事惡事，唯獨在妳身上只找到善良和傻氣，如果可以的話，請繼續傻落去。謝謝你今日單拖赴會。
.
多謝另一位單拖赴會代表Kathy，今日完全無時間同妳傾兩句，又寫兩句肉麻o野，我在工作中不知不覺成日對妳惡言相向，實在萬分抱歉，不過真心果句，我只想妳知道這一行又多醜陋。如今你終於脫離，絕對可喜可賀。仲有，上次個band show令大家不滿意，我真心抱歉，他日如有show再要mc妳又夠疆再搵我我樂意免費效勞，牙齒當金洗。
.
多謝梁文豪，你是我出來工作後唯一的最好最好打死不離好兄弟，你亦係唯一一個要早走而令我最唔愉快的人，唔知點解好想你o係到。我話俾你知，當我知道你拍拖我既亢奮指數係仲高過見到你做野做到嘔(p.s.真嘔)。雖然明知你情人節要陪女，但我已決定嬲爆你，聽日SCE春茗你小心o的，睇路。
.
跟住，無到的都要多謝，多謝Gap宗出黎陪左我一晚，祝你家有喜事精神爽、多謝細輝的祝福，祝你個仔第時好似我咁靚仔、多謝梁景文遠在台灣的關照和幫忙，之前在台搞結婚相勁煩妳唔好意思，唯有祝福妳在台早日落地生根，生個陳水扁出黎、多謝阿儀朋友聽到我結婚好似仲開心過我、多謝阿釗的越洋留言、多謝Hime本身諗住叫埋成隊傭人軍團來賀我、多謝Prewind、Zelda、Argel、Koko、Daphne、遠在澳洲的youtube留言朋友Jay，仲有一班我好想佢地黎但黎唔到的Brian、Albert、泰仔、阿渠、阿細、Pauline、龍馬、肥初、湯慧冰(湯小姐係我唯一一個勁想搵但聯絡唔到的人)、鄭雅怡、BUDA各人排名不分先後SteveJeff本能Joey(其實有好多因為無左contact，小弟之前電話壞左好多都無聯絡到)等等等等，我知道你地會真心 替的高興的，多謝晒。
.
仲有想講，小弟真係一個唔鍾意煩到朋友既人，也因此成為一個唔鍾意擺酒既人，但結果今日老麥派對也未能搞得盡善盡美，悶親不少賓客。講真，小弟無諗過有咁多人的。好想大聲向天疾呼一句：「Well~ 原來我係有朋友o架～」(「Well」字好難大聲疾呼)。寄望今年9-10月情況如果許可，到時再搞一擺酒……藉以測試下大家對煩悶的忍耐程度。Well，唔知有無機會，天時地利人和，到時再說。
.
最後，大家不用提醒我，我會好好照顧阿雞的了。

永高淫相之滿城盡帶黃金甲

長江七號與巴斯光年

本來想率先報案的, 不過最後也被搶先一步。因為小弟內子要上學未能出席, 故找了fxxk club成員阿鼻一起看《長江七號》。佢因為貴人事忙, 仲專程乘的士過來。
.
結果, 奶野了。
.
我的罪咎除了來自套戲不好看、他搭的士來外, 主要還是因為鼻少自《食神》(順有一提佢連食神都話唔好睇)以後便再沒有走進戲院,可說是因我而再度破...戒。
.
不過, 帶著雀躍心情的他, 估計佢應該自看完陳冠希Mahanntan廣告好開心後, 便再沒有興奮過。
.
離開戲院時, 我相當黯然, 卻一點也不銷魂, Send了個短訊給同樣是fans的阿修, 說自己很失望, 再想了一會, 寫了這句作結:「我看周星馳以後還是不要做導演會好一點。」
.
Well, 我不是串, 是真心的。
.
相信之後各大影評將出現「回塘」、「乾塘」、「無貨」、「翻炒」等字句, 而其實, 就住亦都無意思, 唔好就唔好; 唔好的一定多過好,而且多好X多。
.
阿鼻send了一段yahoo影評給我, 很中, 言簡意賅, 幾乎講晒。
.
一粒星是本人對周星馳的最大尊重。
笑片無笑位(失敗)、主題無新意(失敗)、角色無發揮(失敗)、內容無意義(失敗)...欺騙觀眾時間和金錢(失敗)、傷害對他電影長期支持者的心靈(失敗中之失敗)。
(高: 呢句最毒) 「或許這種無聊，正是他對後現代的虛無的一種控告。」
.
.
最後, 讓我「感性」一點的說, 一個人行的路, 是最難走的, 也是最易仆街的。要曲高和寡,覺得人地配合唔到自己, 或者自己配合唔到人而選擇自己行, 就要預左有起有跌。我們今次看見的, 是幾乎由最高跌到最低點。當然, 下面有好多人等緊佢跌落黎, 唔係扶佢, 係指住黎笑。這就是無朋友的後果, 也可能是天才(我已說了可能)的悲哀。所以, 日後將會陸續出現更多比上面更中更毒的評語。
.
巴斯光年, 不是《TOY STORY》的,是謝謝霆鋒的一首歌。送給了自己多年, 現在也送給長江七號。
http://youtube.com/watch?v=wGutFvcugkQ