ケンヂ君...遊びましょ~

首先申報下先，我之前未睇過漫畫的，所以今次入戲院係看這個title的首次感官經驗，但也有接觸過浦沢直樹的《MONSTER》，我無睇《二十世紀少年》漫畫，係因為自己有o的怕好多字既漫畫，我要睇《GANTZ》果o的才覺暢快～不過睇完套戲之後，我相信會在這星期睇番晒成套漫畫～
．
好～講番套戲，我印象中以前睇親日本所有漫畫改編的電影，都好似無一齣好睇，好似之前既《NANA》就算跟晒漫畫既分鏡，但成套野個bit off得交關，導演唔識handle就係唔識handle，加上本身NANA就係以PUNK樂隊為主要骨幹的漫畫，可惜導演只能拍其PUNK形不能拍其PUNK髓，所有野只流於一層包裝，失敗！反而漫畫改編既日劇都仲有o的好野。不過今次《二十世紀少年》終於打破左我呢個睇法！呢套野更打破左日本電影一般出手高但格局小的局面，雖然仍然有少少特技場面上的瑕疵，不過絕對無柒味，而且仲做到少少《FIGHT CLUB》FEEL!
.
再講個故事，我以前成日同賢內說，我好希望有生之前能遇上世界末日，當然那不是一貶眼所有人就死Q晒果種成界末日，而係唔知點樣有個重大危機，人類要死咁七八成，而我就可以憑住我既機智同才華去帶領賢內逃命，而且係一定會成功！《二十世紀少年》exactly就係將呢種心態發揚光大。之前睇《MONSTER》每一個情節鋪排都好認真好嚴肅，大家不苟言笑咁去對付一個怪物大魔頭，今次卻完全唔同，首先個架係將平時細個諗出黎的無聊幻想付諸實行其實已經係一個最大的幽默，然之後仲要搵一班隔左二三十年的中坑好似六師兄弟齊心拯救地球就更加係幽默之中的幽默，成班同學會舊生件過四十卻眾志成城救地球，成套電影的情節不斷在寫實同空想之間來回穿插，將一些無可能在現實中出現的情境以一種很非常現實的姿態表現出來，此乃幽默之最高層次也！處處幽默，便可以看得人不會厭悶，便可以令件事更有趣。《《二十世紀少年》的那種現實crossover空想形式是日本仔的獨家絕招，其他人點扮都扮唔黎，睇下《HEROES》就知！所以我覺得《二十世紀少年》的文本簡直係將日本人的國粹精華一次過噴射出來！
．
在電影中表現出來的日本國粹精華除左現實crossover空想，仲有一班小朋友的正義熱血精神和巨型機械人破壞島國的不安全感，前者無獨有偶唔知點解同《少林足球》的波板糖「放開個女仔佢」好似，後者則不用多說幾乎每一套機械人卡通片都係出於他們這份不安全感，最近上佳之作有《天元突破》，而且離題講句大家都知，就是因為那份不安全感日本人才會攻打中國。此外，日本國粹精華同時體現於導演的說故事技巧，一套咁唔跟常理出牌的劇情都可以拍到令人覺得是一齣懸疑片，我覺得同佢地在偵探小說的高度發展與普及有莫大關係。我有朋友認為他是一套懸疑片，我就覺我好難將之歸類，他本來的漫畫小題稱為「本格科學冒險」故事，我就唔係好知咩叫「本格科學」，不過就覺得這種甚麼元素也有的電影才可以看得人興奮、、看得人有所衝擊，才可以稱得上是「呢個年代的主流電影」。
.
這套電影故之然令我豎起，不過我肯定令日本仔豎起得比我更大更高，因為浦沢直樹係用左大量六七十年代的童年所謂「集體記憶」的元素作為電影中的關鍵「物件」，那上物年有物理性的也有非物理性的，例如基地、例如贈品、例如欺凌、例如商店，全都是那個年代的日本產品，一眾日本中坑怎能不代入？再加上成套戲落重注搵一班大家公認的一線演員參與，在欣賞電影之餘有可以俾一班老鬼觀眾睇星，而且幾乎個個出親鏡的角色也UP得出名的，情況就如當然華東水災成班星去拍《豪門夜宴》一樣，怎教人不心動？我最興奮莫過於見到黑木瞳依穩居最索熟女榜第一位、及川光博無啦啦扮Glay/ L'Arc~en~Ciel 之流在台上唱POP ROCK、超級型佬豐川悅司是唯一一個有鋪排佢出場的角色，在槍林彈雨間不閃不避手刃數名泰仔甚有《GANTZ》的超能人味，還有做黎做去都係做同一組動作的中竹直人曇花一現三十秒，都是令我想在戲院喝采的拍手位。
．
最後，我想講，我初頭真係唔知原來套戲真係有機械人的，我以為只係POSTER耍的一些小技兩，當真係有機械人出現時，我成個內心做左無數次郭晶晶成日做的反身翻騰兩周半加轉體兩周，雖然有部份鏡頭黑漆一片睇得唔清楚，但總算沒有丟人柒眼，而且仲有兩隻機械人在對疊，在《EVA》真人版上映還是遙遙無期的今天，對於我來說此情此景已超滿足，這次日本用咁多錢咁多人力物力去拍一套改編漫畫的電影，可算是一個高風險的投資，不過我認為是做對了！真是他媽的令人熱血沸騰，唯有找找那隻T.Rex的〈20th Century Boy〉做電話聆聲，自我陶醉一番！！