傻雞天真永高淫相@台北

這次台北婚紗攝影可說是自編自導自演，本來一心諗住避年，後來想去得不如去埋影結婚相啦笨。因為我們去果幾日是農曆新年，各大婚紗店和攝影店均關門大吉，結果就自已plan啦。自己在香港租衫再自己pose徵photo化妝，搞左好耐，搞親梁大人，又搞親各灣各大攝影論壇。願者上釣，結果又俾我們搞店，仲要搵左兩位非常好的攝影師及攝影師老婆助手。

安排了一切但安排唔到個天，你點估得到高氣壓滿佈的冬天都可以在台北落雨落足一個月？到步第一日去九份，樓梯就有如瀑布一樣，我連果間戲院都搵唔到，仲諗住學朝偉張震影張 潮到震的相都唔得，只好在在九份的一間茶館坐了大半天，論閒適卻真是閒適得感到有點奢侈。

第二天，本來是安排拍照的日子，結果還是和攝影師商量決定：還是等多兩天吧！希望兩天後不再下雨，兩天後聽天由命。

結果那二天我們去了烏來，行左好耐山，兩旁峽谷的一片春綠蓋上了一層如香港人記憶般依稀的薄霧，兩個(三峽好)人落著雨行，煙雨淒迷，我亦行到西迷迷。行了約二十分鐘後，突然見到一條我畢生所見最大的瀑布從山頂而降，雖不至天上來，不過在瀑布頂卻看見一間屋，原來那是烏來著名的樂園，對我來說也算蔚為奇觀。我們在對岸拍拍照兜過幾個圈，因為下雨，山上人不多，我們坐著那像遊樂場的小火車(不過如果你夠疆伸隻腳出去，唔係講玩，即斷)，由山頂重回山腳，仿如隔世。

接著的活動就是浸溫泉，溫泉座落急湍的脈搏奔流旁，有景有女(備注：雞係女來的)，係爭葡提子，如果唔係就可以欲飲琵琶馬上....風。浸完之後帶住(目及)野既心情去左露天溫泉，結果當然全部都係伯伯婆婆師奶同死o靚仔啦～日落前(Before sunset)離開烏來，去絕頂好味的鼎太豐食佢個小籠包，食到飽一飽都係幾舊水落樓，仲有師傅表演整包～一絕。

講起小籠包又諗起《小白龍情海翻波》既爛gag：

宇：個包係我專登為你整，所以叫小籠包。

芝：咁點解唔叫小白龍包？

宇：梗係啦，因為真係唔係你包家麻。

其實天下爛gag一樣爛，請以後大家唔好再鄙視我的爛gag。

第三日本來想去貓空，可惜雨還是嘩啦嘩啦落個不停，結果還是決定去逛逛西門丁睇下書同買下野，第一站去原本打算巢梁大人個竇，但不果，最終去了附近的台北光點，我在被嚴密監視下(全程阿雞說了不下五十次「屋企好多書」，其實屋企一d都唔多)買了很適量的書和碟，順便買埋手信，後來又好跟得上潮流地去左hello kitty屋食甜品，我指住個女侍應大喝：快d扮Hello Kitty俾我睇～不過無人理我。大家諗唔諗到d女仔去到之後懶係壓低聲講「哎呀好得意呀～」果個死人樣？無錯我就係全程在這種氛圍下食完我的甜品。

第四日是最後一天，也是拍照的一天，天公終於決定閂一閂水喉，THZ GOD～九時正很台北的化妝妹妹前來為阿雞化妝，兩小時後攝影師和她太太一同到來。大家討論行程後我便披著黃金甲雞穿上婚紗搭的士，本來我建議所有行程也乘的士吧(好明顯我受唔起身穿黃金甲的目光)，不過攝影大師堅持唔好晒錢，而且要堅持於捷運影相，我便抱住本死無大害的精神走上捷運車站 。

其實阿雞成件蛋糕咁都未嘈我係唔應該介意，本來「尷尬」呢兩個字對我這等異人來說已相當陌生稀奇，不過由台北去淡水的大半個小時，我過左人生一個既長又鮮有的尷尬期，原來我都識尷尬呢兩個字點寫的。攝影師太太助手也很懂得緩和氣氛，又幫我們拿物件，是偉大的助手。我也為表親切，說些題外話，問一問攝影師有無香港的淫照，豈料他以自豪而堅定的目光回了我一句：「齊～」又再一次證明好野真係無分界限，互聯網彼此同享何其偉大。

到淡水的情人橋時還沒有下雨，不過到漁人碼頭時水喉再一次啟動，大家唯有盡量以保護雞為主要目標，匆匆忙忙的拍，下一站直衝龍山寺，d人多到你唔信，所有信眾的目光也落在我們身上，大家圍著圈的看我們拍照，我覺得自已好似做緊旅遊節目一樣，忍唔住突然指住兩小姊妹講左一句：「好喇下一個輪到妳地喇～」，跟住邀請佢地同我地一齊影相，兩位小姊妹不疑有詐，「喳」一聲就被攝成為我們的回憶，「如相紙把現實替代」。


之後再衝到中正紀念堂(係米而家叫自由廣場？)，取消了國父(?)紀念館，再去最後一站101，雨已把雞的婚紗綑晒黑邊，變成污糟雞，我地兩個既精神狀態也已跌到新低，不過最後仍堅持以我們住的喜瑞飯店為拍攝的最後一站。在此特別鳴謝旅遊大亨阿鼻提供資訊，住完喜瑞之後我都覺得自己成個人hip左，自信心返晒黎。








成個拍攝過程最令我驚訝的，是一直被喻為pose王的我，竟然被攝影大師說我生硬，反而阿雞就非常自然。攝影大師說鏡頭一隊住我我就會板起腰個人超畢直(out bud)，其實此乃我在dance soc期間培養出來的一on show就pose up二位，對於一個專業dancer黎講，咁樣先至係最型的，習慣成自然，呢世都改唔到架喇。

最後，如果你真係咁迷戀我或者阿雞，可以繼續到以下網址睇相：http://www.pixnet.net/album/ShinStudio5f/13578363