08/09

我覺得，流行曲是用來慰藉一些「讀書唔成，一事無成」的人，所以我好陶醉於自己喜歡的歌曲身上。
.
迷戀一些歌曲，為某些偶像而傾倒，談談情，說說愛，再做做愛，一生人貶眼便告終。留低的是別人對自己的回憶跟感覺，虛虛幻幻，偶有一刻遇上令你西西迷迷的人或事，未必傾國傾誠，但足已顛倒自己一生。
.
有一種傷感，是你不至於流下眼淚，不至於悲痛欲絕，但久唔久撩你個心一下，你心裡咒罵「仆你個街哎」，然後無補於事，工作中的話會無心機工作但仍需繼續工作；睡眠中的話會輾轉反則GUT起身煮個麵又或打個BLOG；最幸運係岩岩放工，可以酒逢千己千杯少，醉臥BAR場君莫笑。
.
我早前用了一個晚上，看看我08年做過的好事。我不認為結婚是我的分界線，我的生活依然繼續，結婚並不是我的人生目標，我的目標是給與另一半永久幸福。
.
最令我有所得著的，是今年開學，讀的是我長久以來最想讀的中國文學，認識了一個叫張大春的大師，他將我讚到令我返返去以為自己小六時作文俾老師讚果種飄飄然，我仲忍唔住同身邊的朋友分享，都係我阿婆衰，改我個名做永豪，一個人永豪其實有咩用呢？又，其實一個人咁有用做咩呢；有時人可以任性的話，就任性一點吧；就著自己喜歡的事去做，趁住身邊未有太多枷鎖的時候，能夠放心，可以盡情，人生幾何兼幾可。
.
09年，我將有機會放棄我現在不高不低的人工，去找一份對我而家年紀來說非常冒險的薪酬，去做一些想試好耐但一直因為「讀書唔成，一事無成」而無機會試的東西。我作為一個已婚人士，好應該為了自己的家而儲錢，但如果繼續落去，我見唔到我可以俾到幾多幸福我的另一半；既然係咁，可否放手一做？是「做」，不是博，用心去做，但求做出成績。不過做出成績需要時間，一年，兩年，這就是考驗。貧賤夫妻百事恩定百事哀？最裸膽係，可能唔止百事喎～點先～
.
其實「讀書唔成，一事無成」係我大概七年在在大學拍的一套短片的其中一句對白，估唔到七年後，我都仍然要用呢句野形容自己；果時仲有一句野形容自己：「周身刀，無張利」，七年後發現，我其實連刀都無。
．
09年，我希望可以搵一把刀。九把刀留番俾你睇。
.
寫於不斷重覆聽《乘客》《自由》之時，身處重感冒的太虛幻境之中
.
.
*其實又好唔駛下下去到咁灰既，話晒新一年，唔使獲獲《節外生枝》，整隻《相信》做自己09年本命年（其實唔係）主題曲先：http://hk.youtube.com/watch?v=xwxM3-ZNvo4。共勉。