鼻腔

那邊廂開緊疑似Beyond演唱會，還有那cap水味甚濃的《駒歌》，我尋日睇左套《勁金歌曲》，都有一幕有關Beyond， 雖然無睇過另外兩個show，不過我諗我睇完之後， 都會最鍾意《勁》這一幕。
.
過場時間， 舞台light out，背景響起了家駒同大家講野：「跟住落黎呢隻歌，可能係演唱會裡面最後一隻歌……」， 那是家駒死後的那隻《92-93特別紀念集》的第一首「遙望」的那段獨白,七八十年代的一群應該一定有呢隻碟鎮守家中，跟住，大家又可能好似我咁，聽得太多太多，聽到自己都厭，有一段好長時間將佢冰封，當社會個個都講，個個都懷悗家駒，連唔關事既社評都話家駒有幾影響樂壇、電台只識吹捧原創歌幾X勁幾X勁既時候，你決定唔再講、唔再出聲。
．
個個都話自己見證過Beyond，聽住佢o的歌大，其實你唔係岩岩出世又或者死X左，有邊個住在香港既人未聽過？好歌大家也識欣賞識聽，有邊個唔受感染？
.
果段時間，Beyond四變三，三子口中常常掛著「音樂不死」、「組Band歲月」、「你地未支力我點咁支力」，我同樣聽到有o的驚，你會覺得「仲Beyond」係一件好唔型既事，在香港，你有時一定要這樣，就好似《Big Big World》一樣，明明好聽都搞到你聽到都驚。
．
就係咁，令人再講再唱Beyond的意欲降到好低，亦唔願意再翻卓佢地o的舊歌。
．
好似咩都夠咁。
．
跟住入左大學，聽多左好多唔同o既o野，知道世界很大，知道Beyond原來好Pink Floyd，開始進入另一個聽歌的年代。聽歌係唔（係幾）使錢，唔使原因，你鍾意既，無限不同類型歌曲俾你搵俾你掘。你唔識咩，問下身邊的朋友，他們總有好推介，又或者，你可以睇下「月巴氏音道」。
.
跟住，唔知幾多年之後既一日，唔知遇上咩事，你會撩番出黎，自己同自己講「呀～我以前好鍾意呢隻歌～」
．
隔左咁多年，再拿回Beyond的碟出來，再不會受到那時的討厭氛圍牽絆，聽著歌，想起以前拿著結他練（真的愛你）chord以備母親節無錢買禮物之需、想起以前搭車帶著耳塞時也可以滿腔憤怒（我是憤怒）和無限憂鬱（無盡空虛灰色軌跡），記下謹有的兩三首情歌（喜歡你情人早班火車）來describe自己對暗總對象的詩情畫意，哼著幾首諷刺時弊的（大地農民光輝歲月）覺得自己唔睇報紙但都好關心社會，唱出幾句（點解點解俾面派對）就會睇唔起o的老師同老師作對……諸如此類冰山一角，是我也是大家的集體經驗。
.
這些也是《勁金歌曲》有給我的Bonus。當然，套劇還有更多更多．有幾好唔講喇，可能講到尾其實都係將我地的集體回憶好好的炒埋一碟，不過，炒得好好味，好似黯然銷魂飯一樣，吃得差點流出眼淚。
.
「多謝」、「唔送喇」係導演想借套劇同家駒講的兩句說話，老土，但我受，仲相當感觸，觸到今日拿番《92-93特別紀念集》來聽，觸到想在這裡寫下，就在這刻想起往事。
.
你要唔要o黎一o野？