月冷星淒風蕭索

我的ipod沒有新歌的，近年嚴重到連radiohead隻新碟都唔係好聽得入耳，看來我已停留在某一個年代，走不出來。

．

前幾日搭西鐵已經聽到四五歲的小妹妹大大聲搶先嗌(廣告果三條假Blue Jeans未出現佢已經開口唱）「豈～有～此～理～」，佢當然唔知咩係藍戰士，even我懷疑今時今日未夠二十歲既朋友仔都未必聽過。

．

我唔敢恃老賣老，因為雖然小學年代聽過，但要到覺得隻歌過癮都可能係大學既事。不過有樣野一定要講，就係每次廣告不斷唱「豈有此理」的時候，我都好想駁落去唱埋第二句「熱情熱誠熱愛，困擾著未來，找，不到振作所在」，因為我覺得我地八零年既一代有必要教埋頭先既小妹妹唱埋呢隻歌。而且根據原著，「熱情熱誠熱愛」呢段係有兩個key的，第一個超低Key第二個超高Key，兩個我都handle到……仲有，個「找」字要好用力，真係要話俾人知你「找緊野」，我都可以演繹得好好。能力愈，大責任愈大，所以我成日幻想自己終有一日在西鐵車卡大唱出黎。

．

.

講得Blues Jeans點可以唔講埋Radius，我都林夕過的，仲曾經一度好想背左佢：

庵中孤清清　長平難逃情

江山悲災損　流離仍重圓

花燭映窺粧　難為郎情長

交杯飲砒霜　泉下諧盟鸞

．

最後當然只背到夾集在中間果句「我偶然與她見面亦覺甚疲倦」來形容當時陪女朋友既感慨。

.

話時話，《豈有此理》第一句都幾X勁：「月冷星淒風蕭索」，唔知果時d填詞人為左第一句究竟要度幾耐．填詞人果欄仲要係「某人」，話明俾你知勁人係唔X使出名的。

．

我要澄清，我唔係古慕派的，「站在大丸前，細心看看我的路」我都覺得勁的。

.

最後，既然咁懷舊等係要搵隻重份量既歌作結，最灰係，火雞扮young，問我呢隻咩歌，真係「再自憐便要扣分」。

http://www.youtube.com/watch?v=lk1u32hBAIA&feature=related