@ 2009 AGS

隔了兩個月才寫，件事都差d 唔記得晒。咁點解突然又寫呢？因為我最近見到月巴氏和鼻兄都頻頻update，抱住執輸行頭慘過敗家的心態，我都想update下「2009 AGS」和「2010曼谷之旅」，現在先來「2009 AGS」。

．

這是我最欣賞的一隊跳hip hop的女子組合，相當high school musical的，可惜我介紹她們時說錯了隊名。

就在我自怨自艾覺得自己好唔適合做MC的時候，12月頭機緣巧合下接觸了AGS大會，她們也正在尋找MC，本來以為她們只是想搵人hold cosplay比賽，誰不知原來搵大會司儀。雖知小弟恨做大會司儀已久，在幾乎沒有傾好價錢的情況下，我就已經應承了。

．

能夠和SCE的阿James同台，我夠膽講真係有今生無來世呀～～～～

咁當然大會司儀個名就好聽，真係要做既show其實唔多，因為大型show主辦單位一早已各自搵左MC，我主要係負責大會幾個重要function同埋一o的攝時間的show。雖然全日可能得一兩個show，但我都幾乎要全日standby，結果其實我四日加埋都只係做左6-7個show，包括bossini catwalk show啦、泰拳promote啦、cosplay比賽同表演啦，MISS AGS初賽同決賽啦，仲有最後的閉幕禮。

呢位就係MISS AGS冠軍……名已經唔記得左了。

咁講到最犀飛利的，當然是MISS AGS的比賽，因為個show除左我之外大會更找來人氣o靚模Lavina同我partner。能夠同現今最炙手可熱的o靚模一齊做主持，應該係繼我大學時期同Viann及謝西嘉一齊做MC之後最響噹噹的一次。

其實我講野，都應該真係有少少好笑的。你睇Lavina笑得幾開心。

咁講起Lavina，其實小弟從第一日到第四日對佢既感覺落差係非常之大，簡單黎講係由唔好到好，基於本人一向都係好有口德、隱惡揚善、每個月都會買《HIM》來看的謙謙君子，詳細情形唔講了，只係總括一句：「佢比我想像中對待做司儀一事認真好多。」至於當中的交合呀磨合呀果o的，只好留在心中了，就當我賣關子懶有野吧！

我認為Lavina最漂亮的第四天。

亦都好開心她公司的經理人Kenny在臨走一日大量送贈Lavina精品包括月曆及底褲一條給我，而家個月曆掛了在房，遭到火雞強烈反對，另外條底橫亦慘遭人毒手，而家不知去向。

．

能夠同我偶像杜如風合照，是我今次參加AGS最大的收穫。

除左主舞台之外，我亦有幫《GAME STATION》做左個WINNING ELEVEN既比賽，因為火雞重病的關係，我向SONY要求「不如求其搵條女比我做PARTNER啦」，咁結果又真係搵到喎，講起果條女就犀利了，我形容佢為「舞台上的神經刀」，其實佢事前已經提醒我，佢用唔純正的廣東話（我猜她是剛來港定居不久的內地人）問我：「我可唔可以在個台上講爛gag？」我好誠懇咁望住佢講：「梗係得啦，傻豬黎既～」跟住當我亙式on show旁述兩位參賽者的激烈對賽時，她卻突然間問我：

「你識唔識跳開心舞？」

「咩開心舞呀。」我當時真係醒唔起咩黎。

「有無搞錯呀，開心舞都唔識，係人都識啦，跳完d頭髮仲會棟L添呀～」

「咩棟L呀？」我己經開始feel到佢失控，內心笑到肚癴。

「棟L你都唔知？有無搞錯呀！你知唔知邊個跳開心舞跳到棟L？」

「唔知。」我樂意做下靶。

「賣成龍羅～」

「嘩哈哈哈哈～」我在台上真的笑到肚癴。

這是此女子了，我後來睇番playback，佢叫Lier。I Love Lier。

之後佢仲三番四次拿成龍的名字來開玩笑，令到在台上的我感到有點手足無措，心諗：「如果成龍係度，你咁大聲笑佢，佢一定唔會放過你。」大家唔好忘記，在我們以上對話的時候，參賽者係正在進行爭奪PS3的冠軍戰的。而我亦被佢那些完全同比賽無關的對話打亂了陣腳，連招魂返返主線回到比賽的能力也幾乎欠奉。

後來我終於知道咩係開心舞了，那是一個精神康服者的廣告。

我的前上司林勇先生稱此女子為「永高於舞台上第一次遇上的高手」。I agree with him，論癲論 大膽奔放，我都輸了。起碼我驚得罪成龍大哥。

.

和另一o靚模Rainbow同台。噢，佢地唔鍾意人地叫佢地o靚模的。

舞台上的主要是這樣了，舞台下要數最開心的，就是和我偶像杜如風合照，她真的很正，我也有看了她做那個now TV的開幕禮，她全程淡定有錢淨，又間唔中彈兩句自己野，全程剛柔並重大體有禮令我拍案叫絕，你話人生能夠識到一個好似佢咁既異性朋友就真係開心到震了。識唔到佢，唯有影張相啦。

這位Miss AGS參賽者主動叫我和她在台上不理on show眾目睽睽下公然合照。

好多Cosplayer扮韓國女子組合少女時代。這是極樂鳥那一隊。

仲有見到幾粒星幾個model啦，我仲在藝員休息室邂逅疑似Kama，不過我唔肯定係米，連Kama都認唔到仲話自己鍾意，屎呀；仲有就係撞番好耐無見既阿幽同小藏啦，我仲因為太得閒既關係，煩左佢地成個下午，感覺上，大家也成熟了，能夠在舞台上再有機會介紹她們出場，在台上做些interaction，是我hold cosplay比賽感到最高興的事。

這個pose令我回想我還是一位「單沙」的年代。

最後要多謝阿豪同阿EMI兄啦，幫我留下倩影。總結來說，我也並不是很滿意自己的表現，決賽果度頒獎好亂，結幕禮更是差到無朋友，相比來說，在12月頭幫BUDA GPA於元朗劇院做的那場MC要好得多了，可惜我到現在都未有機會睇番自己playback。其實近年攸MC的機會已少了很多，直到最近才發現，自己其實好易緊張，一緊張，個show就做得唔好。

你睇我呢一身裝束，就知唔係我自願啦，紅紅綠綠很熱鬧，上衣由BOSSINI提供。

在台下等上台的一刻。

寫完頭先段野之後先覺得自己好白痴，呢個道理，三歲都明啦。