談寫小說

看了今期《明周》黃碧雲的訪問，小說未看先追著看訪問，好明顯係鍾意佢個人多個鍾意佢既作品，鍾意佢個人d咩呢？夠型啦我估應該係，邊有作家話自己唔想咁多讀者架？要感謝月巴氏，知我鍾意拿書給我。謝謝。
．
睇完之後，就好想寫篇blog。
．
因為有咁岩得咁橋地，我又岩岩寫完小說，尋晚同亦師亦友的阿鼻兄用左一小時在msn上給與我意見，要知道呢個世界上你寫左篇小說有朋友願意睇係幾咁難得既一件事，而呢位朋友同一時間有兩條戌利寫完小說都塞俾佢睇，而佢又肯睇喎，你話幾難得？
．
因為讀書的關係，我寫左幾篇類似小小說既物體，交功課的，老師是張大春，亦因此寫的時候零舍醒神，好想寫一篇好的作品出來。結果到目前為止，我寫左三篇，一開始的那篇叫《晚殤》，之後畢業論文暫時寫左兩篇，一篇叫《他殺了那女孩》，另一篇叫《那個女孩死掉了》，之後會交多一篇，組成「女孩三部曲」。
．
第一篇逼過Pauline同月巴氏看，第二篇逼過月巴氏和阿鼻看（因為個concept其實係阿鼻的），結論係悶到大家抽筋。再根據火雞既描述，火雞最怕睇字，所以一篇都無睇過，不過佢總結我每次寫完之後既情緒，就係一寫完之後好滿意，之後就覺得篇野好差好悶好不知所謂。諗落，我又好似真係咁皮的。起碼，我而家真係覺得頭兩篇好差，而前兩日完成的那篇《那個女孩死掉了》ok幾好。
．
最開心既係，連阿鼻都話ok，要從佢口中得到ok呢兩個字，難能可貴，雖然佢話因為比較之前果篇，呢篇好左好多，但唔理，總之咩人情分進步分主觀客觀撈埋一齊，有「ok」呢兩個英文字真係令我開心到震。 古乳有雲：阿鼻講ok，難難難，難過李白行蜀道。
．
跟住佢比我既評語，更係準到無朋友，佢話我好容易投入一件事，之後好快咁落手落腳實行，但果份投入又好快完，所以會求求其其搞店埋佢。我好驚訝，因為實情其實唔係識左好耐，但點解可以咁了解我架呢？係「連我自己都唔知自己係咁，俾佢講完又覺得自己完住係咁」的果種野，你話幾得人驚？係米我太單細胞易被人看透？定係佢勁呢？
．
咁點解我要寫呢篇野呢，其實我想講一的好白痴既野，就係：點解要寫小說。其實我好細個已經想做作家，但而家已經完住放棄呢個諗法。甚至認，為點解而家可以死咁多「作家」出黎。而家寫那幾篇野的心態是：好想完成一個屬於自己的作品。一開頭都有痴心妄想可以寫一篇受大家歡迎的作品，陣間唔覺意拿個文學獎就更巴屎閉！不過當我寫左呢幾篇小小說之後，我發現成件事唔係咁！原來好老土的：寫小說，其實係一個認識自己的過程。你想present o的咩俾人，你想點樣present自己，你要表達o的o羊。再down to earth　o的黎講，就好似你寫一個故事，要做資料搜集，跟住當寫出黎仍然係好低尻能的時候，你會發現你除左資料搜集不足之餘，更重要的是其實自己常識非常缺乏。當你寫o的情節好牽強但係你又俾佢過的時候，就是你自己人格上有o的逃避又或求其側側博的陰暗面……諸如此類，回過神來，這才發現，原來自己係咁的。
.
而黃碧雲的那篇訪問，說的其實都是這個過程。她享受寫的時候的快樂，寫完之後唔想理自己的作品，亦不翻看。我不敢說自己像她，但有這樣一種意識。我很清楚自己不是作家這塊材料，不過既然有一個契機，就好好把握，趁還是個有把細火的讀緊書的中坑，有個天大的作家焗住做你指導老師，更重要的是有兩三個朋友願意看畢你的作品給與你意見，就試下寫啦。起碼第日死左，大家想懷念我又或者認識下我的時候，都叫有o的渣拿。
．
接著的第四篇，如無意外，真的是最後了。
．
p.s.寫於明朝李漢威結婚要6:00am起身做兄弟的深夜。